Actualités

Ny any Mahajanga mikolay tanteraka, ny any Ambatondrazaka zara raha misy herinaratra,… Ny any Ambovombe Androy moa dia tena tsy misy jiro intsony na andro na alina, raha ny fampitam-baovao avy any an-toerana. Talohan’ny fety mba nandeha tapak’andro fa izao tena tsy misy intsony, hoy ny fitarainana. Tsy manana vahaolana ny Fanjakana, fa toa ny fitadiavana izay serasera hoentina milaza ny anton’ny fahatapahana sisa no atao, hany ka toa lasa mihevitra ny vahoaka ho bado indraindray. Tamin’ny andro fety, tahaka ny pantekoty sy ny fankalazana ny fetim-pirenena teo, afaka nandeha tsara tsy nisy olana ny jiro tamin’ny ankampobeny. Niverina tamin’ny mahazatra dia fahatapahana lava rehefa andavanandro. Midika fa olana ara-bola no sakana satria tsy ampy ny vola hividianana solika, kanefa tsy afaka manao “requisition” tahaka ny fanao hatramin’izay ny fitondram-panjakana. Hankinina amin’izay Tale Jeneraly vaovao hotendrena ny fanarenana, saingy ho sarotra ny miandry azy raha izao toe-javatra izao. Azo antoka fa mbola ho fitaovana politika amin’ny fifidianana manaraka ny famahana ny delestazy taorian’ny kobaka am-bavan’ny Filoha ankehitriny nanenjika sy nanaratsy ny mpitondra teo alohany saingy vao mainka loza ny nafitsony. Izao potika sy mandohalika ny fihariana maro mila herinaratra saingy tsy maharototra firy ny mpitondra intsony! Izao ve ilay hoe: ho sangany sy ho voalohany aty Afrika sa voalohany amin’ny delestazy no tena izy ?
Toky R