Politique

Izy ireto izay marihina, fa mpanakiana fatratra ny Fitondrana Rajoelina, ary tazana hatrany tamin’ireo hetsika samihafa nataon’ny mpanohitra izao fitondrana izao tany Frantsa. “Tena marina tokoa fa voasambotra aho tamin’ny maraina, nalaina tao an-trano mba hatao “garde à vue”, nalaina tany amin’ny tany misy ahy hatao fanadihadiana, izaho sy Marco Randrianisa. Tahaka ny mahazatra anefa dia tsy afaka nitazona ahy elabe ry zareo, fa voatery namoaka ahy rehefa vita ny fanadihadiana”, hoy I Fanirisoa Ernaivo. Raha hiverenena, ny 25 aogositra 2021 dia efa nisy ny fisamborana azy noho ny filazana ny tenany ho nikasa hanakorontana sy nitondra baomba nandritra ny fivorian’ny MEDEF (Mouvement des Entreprises de France) natrehin’ny Filoham-pirenena Andry Rajoelina, tany Longchamp Frantsa. Navotsotra anefa avy eo rehefa voalaza fa tsy nitombina. “Aty amin’ny tany misy lalàna isika, aty amin’ny tany misy Fanjakana fa tsy tahaka ny any Madagasikara, lasa “Madagougou” tsy misy zavatra mandeha, ka isaorana an’Andriamanitra aloha mbola taty fa raha tany Madagasikara mety tsy tafavoaka”, hoy I Fanirisoa Ernaivo tamin’ity fisamborana faharoa ity. Nilaza kosa I Marco Randrianisa fa rehefa fisamborana tahaka ireny tsy misy azonao atao, fa rehefa any amin’ny birao vao mandeha ny resaka. Niditra “garde à vue” izahay, fa 15 minitra raha be indrindra, fa ny sisa tany amin’ny birao natao fanadihadiana, hoy izy, izay naneho fa ny marina no notenenina tao. Mbola nisy moa ny teny nataony omaly nilaza hoe: “KO debout Rajoelina, il frappe dans le vide”. Nampahatsiahy ihany koa fa tany tan-dalàna ny ao La Frantsa, afaka miteny sy maneho hevitra, fa mila mitandrina satria azon-dry zalahy avadika ho fandrahonana, hoy izy. Tandremana ny fanaovana hetsika mahery vaika lehibe. Ny Minisitry ny raharaham-bahiny teo aloha Atoa Patrick Rajoelina moa no isan’ny tondroin’ireo mpanohitra ny fitondrana monina any Frantsa ho ambadiky ny fitorohana ka nisamborana azy ireo. Mbola tsy nisy kosa hatreto ny fanazavana ofisialy avy amin’ny fitondram-panjakana momba ny antony mazava sy ny vesatra nampisamborana azy ireo.
Toky R