Politique

Fihaonana faharoa taorian’ny 24 martsa lasa teo io. Tao anatin’izany no nilazan’ny Filohan’ny CENI Atoa Dama Andrianarisedo, fa nisy ny vokatra nivaingana tamin’ny asan’izy ireo, ary efa hitahita soritra mazava ny eo amin’ny tontolo sy ny hoenti-manana amin’ireo asa miandry. Ao anatin’izany ny ara-bola sy ara-pitaovana, ny fanavaozana tanteraka ny lisi-pifidianana, ny datim-pifidianana, ny fanatanterahana ireo toromarika samihafa vokatry ny dingana,... Nilaza izy, fa manaraka tsara ny làlan-tsaina voalazan’ny lalàmpanorenana sy ny fifanarahana iraisam-pirenena ny fanavaozana tanteraka ny lisi-pifidianana ka tsy tokony hisy ahiahy mampisy resabe. Ny tanjona dia zavatra roa mazava, dia ny hampiditra ao anaty lisitry ny mpifidy ireo olom-pirenena manan-jo sy mahafeno fepetra, ary mba ho marina sy azo antoka ny lisitra izay mivoaka avy eo, hoy io Filohan’ny CENI io. Maneho fahavononana hikatsaka am-pilaminana ny fangaharaharan'ny fifidianana, ka ny lalan-tsaina mibaiko ny mba hanana lisitra feno, marina, azo antoka manaraka ny lalana, lalampanorenana, fifanarahana iraisam-pirenena. Naneho fa misy ny mangarahara, toy ny hoe: hita ao amin’ny tranonkala avokoa ny antontan'isa isaky ny distrika sy fokontany, misy fanamafisana ny fiarovana ny antontan'isa tsy ho azo hovaovaina (cryptage, filigramme). Mbola hisy fitsirihana na “audit” faharoa ataon'ny OIF (Organisation Internationale de la Francophonie) izay nambara fa mifameno amin’ny an’ireo teknisianin’ny TIM sy HFKF. Nambara fa fanombohan'ny “Basket fund” na kitapom-bola hamatsiana ny fifidianana ny omaly. “Lera izao handehanana amin’ny firosoana ny fifidianana hanamafisana orina ny fitiavan-tanindrasana ho amin’ny tombotsoan’ny firenena, ka manome toky fa tsy hanodinkodina ny safidim-bahoaka fa hitantana am-pahamarinana ny fifidianana. Tsy lera kosa amin’ny filazana sy fanelezana vaovao tsy marina mampisavorovoro ny saim-bahoaka, ka miangavy ny CENI, tsy hatao fitaovana hanilihana ny mety ho tetika politika”. Mino sy mahatoky izany ve anefa ny rehetra ? Omaly ihany koa no nampahafantarana tamin’ny fomba ofisialy ny tohana avy amin’ireo mpiara-miombonantoka dia ny tetikasa RPEDEM na « Renforcement du processus électoral et démocratique à Madagascar », ho tolo-tanana hanatraran’ny CENI ny vinany, izay haharitra 34 volana izany tetikasa izany.

Toky R