Politique

Nampivarahontsana ny resany mikasika ny tsy fandriampahalemana izay nanomezany toromarika ny olona hanao fitsaram-bahoaka. "Raha tena voamarina fa olon-dratsy na dahalo ny olona voasambotra sy tratranareo any amin'ny toerana misy anareo dia aza ampiakarina aty an-drenivohitra intsony fa vitao tanteraka any ny momba azy ireny. Ataovy amin'ny fanaovana azy fa aza andaniana fotoana entina aty, vitao any anaty ala any", hoy ity depiote ity. Kabary toa mitory sy manamafy fa tsy azo itokisana na tsy azo antoka ny fitsarana? Mpikambana ao anaty andrim-panjakana mpanao lalàna anefa no manome toromarika eto. Manana ny heveriny ho fahamarinany izy raha izay tokoa no mety hampilamina ny tany saingy,, misy endrika fandrisihana ny vahoaka hamono olona na sanatria hifamono io. Hafa indray raha toa ka efa misy ny dina, saingy tsy maintsy mila fankatoavana amin’ny lalàna ihany koa ireny. Ara-politika ihany koa, vao ny 24 martsa ihany koa io depiote io no nanao kabary mifono fankahalana tao Mandritsara, nanaratsy mafy ny Filoha teo aloha Marc Ravalomanana sy ny Depiote Siteny Randrianasoloniaiko. "… Manentana atsika jiaby mba hahay hifidy fa maro ireo hilatsaka amin'izany. Marc Ravalomanana olona mpamono olona ka maro vahoaka natao zanadambo ny taona 2002 ary efa nilaza izy fa tsy hanaiky vokam-pifidianana eo raha tsy izy no lany eo" hoy i Velontsara Paul Bert. "Namana lany tato amin'ny vondrona IRD i Siteny Randrianasoloniaiko ka izao nivadika nanao Mihava Tour miaraka amin'ireo Solombavambahoaka vitsivitsy. Olona mpanondrana volamena antsokosoko ingahy Siteny, koa raha tonga eto aminareo aza jerena fa filoha Rajoelina ihany no nihintsika" hoy ity depiote ity. Raha nisy ny fandikan-dalàna na heloka nataon’ireo olona henjehiny, inona tokoa no tsy hitorian’ity depiote sy ny vondron’antokony na koa hanaovana fanadihadiana parlemantera? Inona no tsy handefasana ny raharaha eny amin’ny fitsarana sa te hanao an’ilay hoe : « ataovy amin’ny fanaovana azy » ? Tao anatin’ny famoriam-bahoaka ara-panjakana ankalamanjana io, natrehin’ny Minisitry ny atitany ka efa malalaka izany izy amin’izao sa tsy manan-kery amin’ny IRD moa ilay fepetra noraisina?
Toky R