Politique

 taorian’ny raharaha fitarihana olona nidina an-dalambe teny amin’ny Kianjan’ny 13 may Analakely ny 31 may lasa teo. Raha hiverenana dia nosamborina ny androtr’io i Nambinina Raherimampianina ary nogadraina, ka fitarihana olona hidina an-dalambe sy faniratsiratsirana miampy fanompana ny mpitandro filaminana no voalaza fa antony. Nosamborin’ny mpitandro ny filaminana teny amin’ny trano fonenany teny Andoharanofotsy ihany koa Rtoa Doris Rakoto Samuel omaly alatsinainy 05 jona 2023 maraina, saingy navotsotra sy napetraka eo ambany fanaraha-mason’ny Fitsarana taorian’ny fanadihadiana. Fanohintohinana ny mpitandro ny filaminana (Outrage aux forces de l’ordre), « Attroupement sans armes », ary fihetsiketsehana no hanenjehana azy. Amin’ny 16 jona kosa, raha ny fantatra, no hiakatra fitsarana rtoa Doris Rakoto Samuel. Ho afa-bela ve izy ireo sa hotataovana sazy mihantona na koa halentika any am-ponja tahaka ny mahazo an-dry Berija Ravelomanantsoa, Beharinirina Marcellin,…? Somary mampiady hevitra ny vesatra manoloana ny tranga politika niseho tany Morondava ny faran’ny herinandro teo, na koa ny hafa teo alohan’izay, toy ny tany Analavory. Tsy fiarovana an’ireto olona miandahy henjehin’ny fitondrana ireto fa raha mijery ny zava-nitranga tamin’ny hetsika nataon’ny Mihava Tour tarihin’Atoa Siteny Randrianasoloniaiko tany Morondava ny faran’ny herinandro teo dia niaraha-nahita ny karazana herisetra mihitsy nahazo ny zandary ka nisy mihitsy ireo nitsikasina tamin’ny tany. Nampiaka-peo ny sekreteram-panjakana miadidy ny zandarimariam-pirenena (SEG) hoe : aza mikasi-tànana. Mitovitovy amin’izany ny tany Analavory nanakana an’i Marc Ravalomanana sy ny ekipany, izay nisiana fandravana barazy, narahin’ny kabary niantefa mivantana tamin’ny SEG hoe : sambory aho raha izay no tianao »,… Raha mampitaha, ilay tetsy Analakely ve no tena zava-doza sy atahorana ary azo raisina ho misy faniratsirana ny mpitandro filaminana sa ireo roa hafa notanisaina teo? Izay tsy atahorana ihany no samborina sy ampirimina any am-ponja fa izay atahorana hodiana adala ? Raha ilay resaka fihetsiketsehana tsy nahazoana alalana indray, taiza hatramin’izay no nisy Fanjakana nanome alalana olona handeha hitsikera sy hanakiana azy eny amin’ny 13 may ?
Toky R