Politique

Nolazaina fa tsy nahazo alalana, fa mandika lalàna. Nilaza ny Prefen’Antsirabe Raharison Tsiry Miarana, fa nisy ny fangatahana hanatanterahana izany, ary manaiky fa an’olon-tsotra, kanefa noho ny fanakaikezany tsena sy lalàm-bahoaka ary ny andro sabotsy dia ambony ny fandriampahalemana sy ny fiainam-bahoaka. Nambara fa nihoa-pefy ny TIM satria efa nisy alalana nomena ho an’ny CDA Vatofotsy. Tsy anefa no nangatahan’ny TIM ary ny Magro Avaratsena no azy saingy. Vokany, vao nandalo tao amin’ny tsenan’I Sabotsy I Marc Ravalomanana sy ny mpanara-dia azy dia efa nosakanana sy naparitaka. Nanomboka teo Antsenakely no nirarakopana ny baomba mandatsa-dranomaso, tsy navela hiditra tao amin’ny Magroa Avaratsena. Tsy an-kitsitsy ny fampiasan-kery, nirefodrefotra ny baomba mandatsa-dranomaso, nanjolofotra ny setroka,… Vokany, olona 4 no naratra ka ny 3 no voa mafy, izay ankizy tsy ampy taona voa teo amin’ny ranjony, ary vehivavy 67 taona sy 57 kosa ny roa, tovovavy iray hafa ihany koa torana sempotry ny baomba mandatsa-dranomaso. Mazava izao, taorian'ilay fanamarihana sy fanambarana nataon'ny tompon'andraikitra avy ao amin'ny zandarimariam-pirenena ny zoma teo fa dia ho hentitra amin'ny fifehezana ny famoriam-bahoaka ny fitondram-panjakana dia niditra tamin’ny fampiasan-kery mahery vaika kokoa ny Emmo-nat. Mpitandro ny Filaminana zavon-tany no nalefa tao Antsirabe tamin’iny faran’ny herinandro iny, nisy mihitsy ny “renfort” avy aty an-dRenivohitra. Nanitrikitrika ny Prefen’Antsirabe fa ny famoriam-bahoaka ara-politika dia voafehin’ny lalàna, tsy maintsy anaty ny efitrano no hanatanterahana izany. Nifanindran-dàlana tamin’io ny “redynamisation” an’ny TGV tany Fitovinany fa tsy nisy sakana na ankalamanjana aza, betsaka ny hetsiky ny volomboasary nisy fidinana an-dalambe aza fa malalaka, fa rehefa ny mpanohitra dia ilàna kisa sy lazaina tsy manara-dalàna? Nilaza moa io Prefe io fa tsy nampiasa hery ny mpitandro filaminana fa ny fitandroana ny filaminam-bahoaka no natao.

NIVADIKA DIABE
Na teo aza ny fanakanana sy ny baomba mandatsa-dranomaso, tsy nihemotra moa I Marc Ravalomanana sy ireo depiote TIM miisa 10 tonga nitarika ny hetsika tao Antsirabe. Nivadika ho diabe namakivaky ny tanàna ny hetsika.“Tsy mahasakana antsika ireo. Ataontsika hotetezina mihitsy ny tananatsika”, hoy I Marc Ravalomanana. Tamin’ny 1ora tolakandro no tonga tao amin’ny Top Vatofotsy Antsirabe, ka nandritra izany no nilazan’I Marc Ravalomanana hoe: “Leo lainga tsara lahatra, leo delestazy, leo tsy fahampian-tsakafo, leo laingalainga sy fitapitaka, leo fahantrana,...”. Miha mangotraka ny fifandonana politika vao aty amin’ny ankatoky ny fifidianana ka asa izay hiseho rehefa tena raikitra ny fifidianana ?
Toky R