Politique

Ny Minisitry Atitany sy ny Fitsinjaram-pahefana, ny Minisitry ny Fahasalamam-bahoaka, ny Minisitry ny Rano sy fanadiovana ary fidiovana, ny Minisitry ny Tontolo Iainana sy ny Fandrosoana Lovain-jafy, ny Minisitry ny Asa Vaventy, ny Minisitry ny Tanora sy ny Fanatanjahan-tena, ny Minisitry ny Fanajariana ny Tany sy ny Fananan-tany ary ny Sekreteram-panjakana misahana ny Tanàna vaovao sy Toeram-ponenana no namarana izany. Ho an’ny Minisitry Atitany sy ny Fitsinjaram-pahefana, teboka maromaroma no nosinganina dia ny : famatsiam-bola avy amin'ny Fanjakana foibe izay mitentina 97 283 160 000Ar. Ny 9 660 000 000Ar ho fampandehanana ny Faritra (420 000 000Ar isaky ny Faritra), 50 850 000 000Ar ho fampandehanana ny Kaominina (Ar 30 000 000 isaky ny Kaominina), 11 640 000 000Ar fanampiana ara-bola fanampiny ho an'ireo Kaominina ahitana mponina mihoatry ny 5 000, 2 787 680 000Ar "subventions SEC", 3 582 480 000Ar "subventions CSB", 361 000 000Ar "subventions EPP", 18 402 000 000Ar tambin-karaman’ny Lehiben’ny Fokontany sy ny Lefiny, raha ny tatitra. Teo ihany koa ny naovana hetsika fanomezana kopian'ny sora-pahaterahana sy karapanondrom-pirenena faobe maimaimpoana ho an'ny olom-pirenena feno 18 taona noho mihoatra, izay nahitana mpahazo tombontsoa miisa 1 474 917; fanaovana hetsika fanomezana kopian'ny sora-pahaterahana ho an'ny zaza latsaky ny 18 taona, ka zaza miisa 26 000 no nisitraka izany tao anatin'ny Faritra Fitovinagny, Anosy, Analamanga sy Atsinanana,... Tsara kosa etsy andaniny no mampahatsiahy fa tany amin’ny volana desambra 2022 no nampanantena ny Filoham-pirenena fa hakarina avo telo heny ny tambin-karaman’ny sefom-pokontany, ka raha 40 000Ar dia hiakatra 120 000Ar izany. Nolazaina fa hatramin’izay tsy nisy mpijery ireo sefom-pokontany, fa ity Fanjakana ity no nahavita an’izany. Akaiky rahateo moa ny fifidianana ka mandeha ny pi-maso. 5 volana aty aoriana anefa, betsaka ireo fokontany milaza fa tsy mbola mihatra io, tsy misitraka izany intsony. Sa hanaovana fihetsiketsehana manokana toy ny fizarana fifanarahana arak’asan’ireo mpampianatra FRAM voaray ho mpiasam-panjakana ny fizarana tambin-karaman’ny Sefom-pokontany rehefa atomotra ny fifidianana?
Toky R