Politique

Tsy midika ho fanivaivana na tsy fitiavan-tanindrazana ka hanosihosy ny sainam-pirenena malagasy ny fananganana saina fotsy, hoy i Patricia Raharisoamalala, mpitarika fiarahamonim-pirenena saingy isan’ireo manangana saina fotsy anaty tambazotran-tserasera ankehitriny amin’ny maha olompirenena azy. Fotoana fananganan-tsaina izao, hoy izy, dia fomba iray entina hanehoana ny hevitra koa ilay izy hoe misy ny zavatra mangeja anay olompirenena eo amin’ny sehatra maro samihafa amin’ny fitantanana eto anivon’ny firenena na lafiny sosialy io fa indrindra ny tsy fandriampahalemana izay mavaivay ka tsy ahafahan’ny vahoaka mihary an-kalalahana. Midangana ny fiakaran’ny vidim-piainana. Tsy mahasehaka izany ny karaman’ny mpiasa. Eo koa ny fikorontanana maro samihafa na ny haratsian’ny lalana, ny ady tany, ny fanjakan’ny kolikoly. Misaraka 2 mazava tsara ny farim-piainan’ny olona eto Madagasikara. Ao ny manankarem-be izay milomano anaty harena miavosa. Misy kosa ny tena mahantra fadiranovana. Tia filaminana tsy miandrandra korontana intsony nefa ny ankabetsahan’ny olona. Io fananganana saina fotsy io izany no enti-milaza fa mijaly izahay olompirenena. Jereo ny fomba fitantanana eto amin’ny firenena! Tamin’ity taona ity aho no tsy nanangan-tsaina fa amin’ny 26 jona aho hanangana ary hivavaka ho an’ny fireneko. Vita izay dia miala ny saina. Ny sosokevitra dia hoe marina fa nisy ny fifidianana nanomezantsika fahefana ireo mpitondra. Izy ireo izany no manana ny hoe ity praograman’asa entina hitsaboana sy handaminana ny olana maro samihafa eto amin’ny firenena. Tsy tokony hanao tsinontsinona ny fanehoan-kevitra ireo tomponandraikitra rehetra sy voakasika eto amintsika. Voizina tsinona amin’izao ny hoe andao hifampiresaka sy hifampihaino ka tokony mba ho jeren’ny mpitondra izany izay azo raisina amin’ireny fitakiana mivaivay sy fanehoan-kevitra ireny, hoy hatrany ny tenany.
J. Mirija