Politique

Niparitaka ary niseho masoandro ny antontan-taratasy mifandraika amin'izany, hatramin'ny sombin-dahatsoratry ny gazetim-panjakana any Frantsa mampiseho hoe nahazo tokoa ny zom-pirenena Frantsay nanomboka ny novambra 2014 i Andry Rajoelina. Niitatra hatrany amin'ny filatsahan-kofidiana sy ny fifidianana Filoha tamin'ny 2018 ny resaka, lasa nivoaka ny hoe Frantsay ve izany no nitondra an'i Madagasikara tato anatin'ny 5 taona ? Raha ilay lalàna 60-064 tamin’ny 22 jolay1960 dia milaza ao anatin’ny andininy faha-42 fa ny olona rehetra izay feno 18 taona ka mangataka hanana zom-pirenena hafa, dia very ny zom-pirenena maha Malagasy. Ara-politika, mety ho sahirana i Andry Rajoelina.Araka ny loharanom-baovao iray dia somary mikorapaka ihany ny ao anatin’ny Etamazaoro politikan’ny MAPAR. Misy fanina hatramin’ny mpiara-dia amin’ny Filoha ankehitriny satria raha ny fandehan-draharaha dia toa tsy nisy nahafantatra firy an’iny. Misy milaza hatramin’ny hoe: “Zandry kely tsy mba nilaza nialoha ny fisian’ireny zavatra ireny sa ve tsy atokisany isika?”. Na izany aza, mandeha ny famoriana ireo mpahay lalàna na « juriste » hikarohana ny mety ho fananan’ireo Filoham-pirenena teo aloha sasany efa nodimandry na mbola velon’aina zom-pirenena Frantsay, mba hoenti-maneho fa efa karazana didy fakan-tahaka na « jurisprudence » ity fahazoan’ny Filoha Malagasy zom-pirenena Frantsay. Ilay fomba nahazoana azy tamin’ny alalan’ny « naturalisation » taorian’ny naha feno taona anefa no tena adihevitra satria io ilay hoe : mahavery ny zom-pirenena ka mety tsy hitovy ny fomba nahazoana ilay izy. Efa nisy adihevitra nitovitovy tamin’io tamin’ny fiandohan’ny taona, ka ny namalian-dRtoa Christine Razanamahasoa azy dia hoe: “Tsy mitombina ny filazana fa tokony esorina tsy ho filoha ny Filoha amperin’asa noho ny fizakany zom-pirenena roa satria malagasy ray sy reny izy. Ankoatra ny andininy faha-42 voalaza ao anatin'ny Code de la nationalité, dia tokony dinihina manokana ihany koa ny andininy faha-45 izay milaza fa ny fahaverezan'ny zom-pirenena dia miainga avy amin'ny fangatahan'ilay olona ary mahazo fankatoavana avy amin'ny governemanta Malagasy amin'ny alalan'ny didim-panjakana. Na inona na inona fanazavana na fiarovana handeha, mampihena ny herijika politikan’Atoa Andry Rajoelina iny. Na izany na tsy izany, fotoana izao hijerena sy handinihana akaiky ny resaka lalàna manodidina an’io zom-pirenena io sao lasa diso làlana any amin’ny adihevitra diso isika ?
Toky R