Politique

Nisy ny dinika ny fomba azahoana olona maro hanotrona ny fahatongavan'ingahy Filoha ireo, raha ny loharanom-baovao marim-pototra hatrany. Atao izay fomba rehetra hamoahana sary, fa tena mbola mamim-bahoaka sy be mpanohana i Andry Rajoelina, ka homanina fatratra ny fomba hitarihana ny olona. Fokontany iray mitady olona 100, olona 100 mitady olona 10 avy ; Sokafana sy hamoraina ny fiakaran'ny olona avy ambanivohitra, taomina ny vahoaka ary homena nofon-kena mitam-pihavanana raha tsy misy ny fiovana ; Hiaraka aminy avy ao koa ny Minisitry ny Fampianarana, ka ny mpampianatra rehetra dia voalaza fa homena baiko ho tsy maintsy tonga eo ; Hakana artista malaza, ary mety asiana loka ahazoana moto sy ny maro hafa ; Ahetsika ny sokajina fanatanjahantena misy rehetra ao anatin'ny distrika ; Ny radio rehetra misy any dia samy hanentana daholo ; Ahetsika ihany koa ny fikambanam-behivavy,… Voalaza fa hanao « Tam Tam » ny sefom-pokontany rehetra ; hanao fizaham-pahasalamana amin'io andro io. Ampahany amin’ireo zavatra tapaka tany an-toerana ireo. Midika izany fa mikofokofoka mafy hanehoana sary politika fa mbola tiam-bahoaka ny Filoha Rajoelina ireo mpomba azy, ka hatao izay fomba rehetra ahafahana manatanteraka izany. Toa hanaovana ny tsy fanao mihitsy aza ! Marina fa zava-dehibe ny fahaizana mandray vahiny, ary tsy olonolom-poana fa Raiamandreny farantampon’ny firenena. Na izany aza, lasa miteraka sary ratsy matetika satria toa lasa mitady ho filalaovana saim-bahoaka amin’ny endrika ivelany, kajy politika avo lenta, fanerena na fividianana ny olona an-kolaka hanara-dia ilay fitondrana,… Raa miditra lalina amin’ny politika, ny sefom-pokontany izany dia manana andraikitra amin’ny fikirakirana ny raharaham-pifidianana ka azo antoka ve ny tsy hisian’ny fanambazana na tsindry hanome tombondahiny ny fitondrana? Ny lalàmpanorenana any amin’ny andiny faha-39 no mamaritra ny tsy fiandaniana politikan’ny fitantanan-draharaham-panjakana, ny fampianarana,… ka ara-dalàna ve ny fanerena sy ny fandokoana ho volomboasary ny mpampianatra ?
Toky R