Politique

Ohatran’izay efa nifarana, araka izany, ny fibahanan’i Rajoelina sy Ravalo ny raharaha politika eto Madagasikara, raha vantanina ny resaka. Ny filoham-pirenena teo aloha, Marc Ravalomanana, dia lany fanindroany ny taona 2006. Vita izany ny fe-potoam-piasany ny taona 2011 ary tsy afaka nilatsaka intsony, raha toa ka nizotra tao anatin’ny lamina demokratika, araka ny famaritana iraisampirenena azy, tamin’ireny fotoana ireny ny toe-draharaha. Ny filoham-pirenena ankehitriny, Andry Rajoelina, izay lany ben’ny tanànan’Antananarivo renivohitra ny taona 2007 raha atao hoe nety nandimby azy tamin’ny alalan’ny fifidianana ara-demokratika ka notombanana ho nanao taom-piasana miisa 2 ihany koa dia mety efa tsy afaka milatsaka intsony koa ohatran’izay, raha tsy sanatria hoe nanova lalàmpanorenana nampetipety azy avy angaha ny fitondrana mety ho notarihin’izy mianaka. Ankehitriny, potika ny firenena, ary isan’ny saika matoan’ny fanehoan-kevitr’ireo mpamakafaka sy mpanao politika maro momba izany ny adin’izy mirahalahy ireto tsy mety mifarana. 15 taona izany izao no nifampitady teo amin’ny sehatra politika i Marc Ravalomanana sy Andry Rajoelina , ary na aiza na aiza eto Madagasikara dia mahalala ireo anarana ireo . Niteraka ady hatrany anaty fianakaviana noho ny firehan-kevitra tsy mitovy nitarika fifanenjehana. Ho avy indray ity ny fifidianana Filoha dia mbola hifanandrina indray ve izany izy mianaka , hoy ny tombatomban’ny mpanaraka raharaham-pirenena, raha toa ka noheverina hoe tamin’ny 2018 no ady farany tokony nifanazavan’ny roa tonta. Tena mpifanandrina politika marina ve sa vazaha mody miady araka ny fitenenana, hoy koa ny fanontaniana hafa matetika ? Efa nivoaka mihitsy aza moa avy amina mpanao politika sasantsasany ny fehezanteny hoe : mpifamelona ara-politika i Marc Ravalomanana sy Andry Rajoelina ka tsy mahazo aina ny iray raha tsy eo ny iray . Ho hita eo indray ny ho fisehony manaraka e !
J. Mirija